KRALENDIJK- Gezaghèber  Edsion Rijna ta komprondé ku e hasimentu di tèst di Covid ambos ora di bai i ora di bin ta hasi doló den pòtmòni di siudadanoan. 

“Pesei mi ta den kombersashon ku nos islanan hermana, pa wak si por trese un suavisashon den e kondishonnan aki, sea pa ora di bai, komo ora di bin”, asina Rijna a enfatisá. Un suavisashon di e kondishonnan aki, lo bai konta primeramente pa hendenan ful bakuná. “Nos sa ku e hendenan aki tin ménos chèns di bira malu, i si nan bira malu mes, hopi biaha e no ta asina severo”, asina Rijna a bisa. 

Aunke ku, segun Rijna, e kombersashonnan ta andando, no por primintí kiko resultado di esaki lo ta riba termino kòrtiku. “Kada bes ku e kondishonnan kambia, mester kuminsá sondea atrobe kiko ta posibel òf nò” asina Rijna a bisa.