KRALENDIJK- Daisy Coffie a saka un komunikado basta skèrpi, poniendo minister Kasja Ollogren na su lugá pa loke ta trata su ‘sugerensianan’ pa baha gastu di entre otro koriente i awa na Boneiru.

“Na Boneiru nos ta konsiente i ya pa añanan nos ta hiba kampaña den nos komunidat pa spar mas ku ta posibel riba uso di energia, esta riba uso di awa i koriente. Pues riba su mes e minister no mester manda nos hendenan bai baña ménos ni uza ménos èrko”, asina Coffie ta bisa.

Ademas, segun Coffie, e minister ku e deklarashonnan ta demonstrá di no tin konosementu di nos situashon klimatológiko kaminda temperatura di 33 grado pa dia ta algu normal den nos ambiente. “Freska nos kurpa te dos biaha pa dia ta parti integral di nos bida diario i sende èrko òf pone un fèn ta nesesario sigur na ora di drumi pa nos hendenan tin un deskanso físiko i mental pa tur dia lanta di nobo ku energia i ehersé nan labor””, asina Coffie ta bisa.

Opstakulo

Coffie ta mustra tambe ku ta e mesun Hulanda a rekonosé ku e temperatura haltu ta un opstákulo pa nos muchanan por siña den un ambiente di lokalnan kalor i a opta pa pone èrko den tur klas aki na Boneiru. “Loke mi ta haña mas importante ta ku e minister mester sa ku gabinete Rutte, di kua minister Ollongren ta forma parti di dje a komprometé su mes pa rebahá e gastunan haltu di kosto di bida i di hasi negoshi na Boneiru. Sekretario di estado Tamara van Ark dia 10 di òktober 2019 a skirbi ku un di su metanan ta pa rebahá strukturalmente e gastunan di koriente riba nos islanan. Te awe esaki no a keda realisá. Loke nos por konstatá ta ku e gastunan di bida desde 2019 juist a subi: entre otro preisnan di kombustibel, produktonan den supermerkadonan i tarifanan di koriente a subi drástikamente”, segun e miembro di Konseho Insular.

Plan

Coffie ta referí tambe na e echo ku for di 2019 WEB den konsulta ku ministerio di EZK a traha un plan di energia pa yega na 80% di produkshon di energia duradero ku un meks inovativo di mulina di bientu, energia solar i reserva dor di bateria. E invershon aki lo kosta 58 mion dia kua e petishon ta pa 32 mion na supsidio. Esaki lo tin komo konsekuensia ku e tarifanan lo baha poulatinamente ku 50% kompará ku e tarifa aktual di 29 sèn di dòler pa Kilowatuur. Lo tin un bahada di 15 mion dòler pa aña ku ta un bahada pro medio di 24 dòler pa luna pa un kas di famia.

Supsidio di e 32 mion dòler lo duna realse na e deseo ekspresá dor di Tweede Kamer atraves di e moshon di Atje Kuiken kaminda e ta supliká gobièrnu Rutte, di kua Ollongren tambe ta forma parti pa: “het openbaar lichaam Bonaire c.q. WEB actief te faciliteren bij het spoedig verkrijgen van voldoende middelen/subsidies om het verduurzamingsplan uit te voeren op een wijze die bijdraagt aan een structurele verlaging van de tarieven”.

Esfuerso

Coffie ta bisa ku e ta para 100% tras di e plan di WEB i e ta di opinion ku e minister Ollogron lo mester enfoké riba e lokual ta nesesario pa yega na e invershonnan nesesario na WEB.

“Esaki lo demonstrá ku e gabinete ta serio den su esfuersonan pa redusí gastunan aki riba nos isla den e lucha pa limitá pobresa mas tantu ku ta posibel. Palabra i akshon awor ta na minister Ollongren. Nos pueblo tambe tin derecho riba un desaroyo riba e tereno di energia aki ku ta duradero i sostenibel. For di 2008 nos a skohe e rumbo aki i riba propio forsa a hasi invershonnan I na e otro un banda ta deber di gabinete i di nos minister di asuntunan interior pa hasi su máksimo esfuerso pa sostené e esfuersonan aki i pa logra esaki”.