KRALENDIJK- For di promé di novèmber 2021, Merka no ta un pais di riesgo hopi haltu mas pa Boneiru, sino un pais di riesgo haltu. Esei ta nifiká ku e tèst obligatorio e di sinku dia despues di yegada no ta konta mas pa biaheronan for di Merka.  

Boneiru a adaptá e lista di paisnan ku riesgo, e adaptashonnan ta na vigor for di promé di novèmber 2021. 

Brasil i Costa Rica promé tabata pais di riesgo hopi haltu i ta awor pais di riesgo haltu.  Biaheronan kompletamente bakuná for di e paisnan ei mester yena e deklarashon di salú i hasi un tèst di PCR dentro di 48 ora promé ku salida. Biaheronan no bakuná for di e dos paisnan akí mester yena e deklarashon di salú i 24 ora promé ku salida hasi un tèst di PCR òf un tèst di PCR dentro di 48 ora promé ku salida i un tèst antígeno na yegada. 

Argentina i Canada promé tabata pais di riesgo haltu, pero riba e lista nobo a bira pais di riesgo abou. Biaheronan kompletamente bakuná for di e dos paisnan akí no mester tèst mas promé ku nan biahe pa Boneiru.  Sí nan mester yena e deklarashon di salú. Pa algun pais oropeo a adaptá e nivel di riesgo. 

Dinamarka, Alemania, Fransia, Finlandia, Portugal i Spaña tabata pais di riesgo haltu promé, pero a bira awor pais di riesgo abou.  Pa biaheronan kompletamente bakuná for di e paisnan akí ta konta ku nan no mester tèst mas. Sí nan mester yena e deklarashon di salú promé ku nan biahe pa Boneiru.  Biaheronan no bakuná for di e paisnan akí mester yena e deklarashon di salú i dentro di 48 ora promé ku salida hasi un tèst di PCR.  

Riesgo

Na www.bonairecrisis.com por mira e lista nobo ku nivel di riesgo pa pais i ta resumí e kondishonnan di biahe pa biaheronan pa Boneiru.  Ta konsiderá e paisnan ku no ta riba e lista komo pais di riesgo haltu.