Paramaribo- E kompania estatal di aviasion di Sürnam, Surinam Airways (SLM), ta bai drenta den un proseso di restrukturashon.

E kompania a wòrdu afektá severamenta pa e pandemia di Covid. Pa empeorá kos, e kompania mester a debolbé su úniko avion Boeing 777 ku tabata usa pa kubri e ruta mitatlántiko. Esaki ta nifiká ku e kompania ta dependé riba otronan pa ehekutá e ruta aki. Pa algun tempu kaba, Air Belgium ta ehekutando e buelonan pa SLM.

Resientemente e kompania a nombre e hulandes Paul de Haan, pa guia e proseso di reorganisashon pa skapa e aerolínea.

Sindikato

E sindikato ku ta representá trahadónan di SLM ta pará positivo pa ku e proseso. “Nos no ta wòri ku a nombra un hulandes komo direktor di SLM. Basta e tin konosimentu di materia i basta e logra e meta pa sanea e kompania”, asina Steven Samson di e sindikato a bisa.

Debe

Na tur SLM a akumulá un debe di 102 mion dòler merikano. Banda di e ruta mitatlántiko, SLM ta bula tambe den region, entro otro pa Kòrsou, Aruba, Trinidad, Belén (Brazil) i Guyana. E buelonan regional ta wòrdu ehekutá ku dos Boeing 737.

---

Lesa tambe:

• 
  Fundashon Across The Isles ta bai kordiná  aktividat rondo di  historia di sklabitut na Boneiru
• 
  Tayer skibi buki pa mucha tokante herensia kultural, tabata un gran éksito
• 
  Fondo Nasional di Restorashon ta duna un fiansa pa restorashon di The Old Gin House na Sint-Eustatius
• 
  Kampaña nobo ‘You’ve got the power’ a ranka sali na Boneiru
• 
  Thuersten Winklaar ta bringa pa e título di Kampion Hulandes na Den Haag