KRALENDIJK – Boneiru a keda selektá komo un di e mihó destinashonnan di National Geographic Traveler den 2022. E asina yamá lista di ‘Best of the World’ (Mihó di Mundu) ta un di e listanan ku mas tantu influensia na mundu pa loke ta trata biahamentu i e ta keda publiká den tur edishon internashonal di National Geographic Traveler, tantu den forma imprimí komo online.

National Geographic Traveler’s ‘Best of the World 2022’ ta repartí den sinku kategoria – naturalesa, aventura, kultura, sostenibilidat i famia – i ta premia 25 destinashon spesial ku un storia relevante pa e aña binidero. Boneiru a keda klasifiká den e kategoria ‘famia’ i nan ta deskribí nos isla komo un sitio ideal pa huntu deskubrí su mundu bou di laman, hasiendo menshon di Bonaire Marine Park – Parke Marino Boneiru. 

‘Ku Boneiru ta aparesé riba e lista di ‘Best of the World 2022’ di National Geographic Traveler, naturalmente ta un promoshon internashonal fantástiko ku sigur lo benefisiá popularidat di nos isla. Mundialmente tur hende ta anhelá pa por biaha atrobe i deskubrí destinashonnan nobo i pa e motibu akí nos ta sumamente kontentu ku e honorabel menshon riba e tòp 25 di e mihó destinashonnan den 2022. Nos ta anhelá pa risibí bishitante nobo i pa kompartí tur e sitionan bunita i karakterístikanan úniko di nos isla ku nan’, segun Miles Mercera, CEO di Tourism Corporation Bonaire. 

E lista a keda kompilá, investigá i formulá den koperashon ku e redakshonnan internashonal di National Geographic Traveler, ku ta sirbi miónes di lesadó via e revistanan i wèpsaitnan plamá riba mundu henter. For di awe por haña e lista hulandes riba natgeo.nl/best-of-the-world-lijst-2022. E lista di ‘Best of the World 2022’ ta keda publiká tambe den e próksimo edishon di yanüari di National Geographic Traveler Nederland, simultáneamente ku e vershon merikano i otro edishonnan internashonal.