WILLEMSTAD- Un falta di empleado di imigrashon a kondusí na un situashon poko agradabel djabièrne atardi na aeropuerto di Kòrsou.

Pasaheronan ku a yega aeropuerto na tempu, despues di a check-in, mester a para den rij te ku 3 ora pa por a pasa e balinan di imgrashon. A pesar di e echo ku tabata tin un par di shen di pasahero ku mester a sali masomenos na mes momento, tabata tin apenas 3 empleado na e balinan di imigrashon.

E wardamentu largu, den mayoría kaso 2 pa 3 ora pa por a pasa e balinan a kondusí na hopi frustrashon serka hopi pasahero, ku tabata tin miedo di a pèrde nan buelo. Buelonan di entre otro KLM, Tui i Avianca, tur sali mas ku 1 ora i mei lat, pa motibu di e echo ku pasaheronan no por a yega na gate. 

No ta promé biaha ku e situashon aki ta surgi na aeropuerto di Kòrsou den temporada di fin di aña, pero asina ferfelu manera djabièrnè último te ainda a sosodé masha poko biaha. 

Boneiru i Aruba

Pasaheronan ku mester a biaha pa Boneiru ku Aruba ku entre otro Divi Divi ku EZ Air, tambe a haña nan mes ta para mas ku 2 te 3 ora den reinan huntu ku pasahero ku mester a sali riba buelonan internashonal. E aglomerashon di hende, manera por mira riba e pòtretnan, for di punto di bsita di prevenshon di Covid-19, tabata leu for di optimal.