KRALENDIJK- Kolegio ehekutivo ketu bai lo ke implementá un sistema nobo di kobra belasten riba turista ku ta bishitá e isla. Aunke ku inisialmente ker a implementá e impuesto nobo entrante promé di yanüari 2022, esaki no ta faktibel mas. 

Segun diputado di turismo, Hennyson Thielman, ainda ta trahando riba sierto detaye di e lei ku lo mester implementá e belasten nobo. Tambe ta studiando sierto detayenan tékniko pa loke ta e kobransa di e impuesto aki.

Mas amplio

Mientras ku no necesariamente por bisa ku lo hisa e belasten kompará ku esnan eksistente, pero sí e intenshon ta pa asigurá ku un base mas amplio lo kontribuí na esaki. E idea ta pa hasi pago ònlain posibel pa tur hende, asta promé ku nan yega e isla. Unabes ku paga e montante di impuesto aki, e turista por drenta i sali durante di un aña kompleto, sin ku e mester paga e impuesto di nobo. 

Tambe lo tin tarifa spesial i mas abou pa bishitantenan di e otro islanan di anterior Antia Hulandes. 

Partidonan di oposhishon a hasi sierto komentario riba proposishonnan riba mesa, pa loke ta trata e impuesto nobo. Sin embargo, esakinan no a keda kontestá ainda pa Kolegio Ehekutivo.