ORANJESTAD/THE BOTTOM- Kontrali na e situashon na Boneiru,  direktiva di e kámera di komersio konhuntu di St. Eustatius ku Saba, niun ratu so no ta di akuerdo ku e oumento drástiko ku ta bai implementá den tarifanan pa registrashon i inskripshon na Kámara di Komèrsio i Industria na islanan BES. 

Segun miembro di direktiva saliente pa Saba, Hemmie van Xamten, a ekspresá esaki na vários okashon den e trayekto di konsulta, pero no a skucha e opinión di Saba ku St. Eustatius den esaki. Frustrá dor di e echo ku nan no a wòrdu skuchá, direktiva a asta manda un karta direktamente pa minister di asuntunan ekonómiko. 

Krítiko

E miembro di direktiva nobo, ku apenas dos siman pasá a wòrdu eligí na St. Eustatius, Vaughn Sams, tambe ta mustra su mes hopi krítiko pa ku e oumento ku lo drenta na vigur entrrante promé di yanüari 2022.

“Mi mes ta negoshante i pa mi bisa bèrdat, mi tampoco no ta komprondé dikon e tarifa mester subi asina drástikamente. Sigur 70% di tur negoshante ta bai wòrdu konfrontá ku un oumento di 200 pa 300% di loke nan ta paga awor aki. Esaki no por ta posibel, ni e no ta algu deseabel”, asina Sams a bisa.