KRALENDIJK- Sekretario di Estado pa asuntonan interior i di Reino (BZK), Alexandra van Huffelen ta pensa ku trahamentu huntu ta masa importante pa logra sierto kos pa e islandan di Karibe Hulandes.

Esaki Van Huffelen a bisa djaluna atardi den un kombersashon ku Awor.nu. “Mi tin ku bisa ku nos tin un tim di ministerio, departamento i kolega ministernan, ku tur ke traha huntu pa e islanan aki realmente bai dilanti.

Sèn

Segun van Huffelen, den e akuerdo di gobernashon di e gabinete Rutte IV, tin basta sèn adishonal presupuestá pa Karibe Hulandes. 

Sin embargo, Van Huffelen a enfatisá ku koperashon ku mandatarionan na Boneiru tambe ta bai ta un faktor krusial. “Nos no por hasi kos nos so. Pa mi bisele aun mas fuerte: esei no mester ke tampoko. E yabi mester ta den kooperashon real entre tur ministerio, departamento, pero tambe mandatario na ámbos banda pa nos por logra kosnan signifikante pa e islanan aki.

Pobresa

Aunke Van Huffelen a bisa di un banda ku ela keda impreshoná pa e bunitesa di e islanan i tambe su habitantenan, e ta sinti preokupashon tambe pa e problema persistente di pobresa riba e islanan. “Esaki ta rekerí pa nos redoblá nos esfuersonan i realmente traha huntu pa nos por kombatí pobresa”. E sekretario di estado a atmití ku varios kos a bin huntu ku lo por afektá e forsa di kompra riba e islanan. “Huntu ku entre otro mi kolega Marnix van Rij, di fiskalidat i servisio di impuesto, mi ta studiando kon nos por aliviá algun di e problemanan aki.