KRALENDIJK- Miembro di Konseho Insular, Daisy Coffie, ta bisa di sinti su mes optimista despues di e bishita di secretario di estado Alexandra van Huffelen na Boneiru. Coffie ta bisa ku ta importante pa huntu nos sòru pa nos kontaktonan keda estrecho ku komprenshon mutuo i e deseo pa fortifiká otro.

Aunke ku ainda Van Huffelen no konosé e islanan karibense hopi bon, tòg Coffie ta di opinion ku trahamentu huntu ta importante pa tur parti di Reino, i ku esaki ta trese bentaha pa tur partido den Reino. 

Pensa mas leu

“Nos sa kiko ta nifiká pa pensa mas leu ku nos fronteranan. No nesesariamente pa komèrsio i no pa ganashi, pero pasobra pa medio di eksperensia propio durante hopi siglo nos ta realisá ku konekshon berdadero i duradero no ta surgi for di ganashi propio, pero for di eksperensianan i balornan kompartí. Mi ta bisa tur esaki ku un hemut kontentu. Mi ta bis’é ku speransa, ku optimismo i ku e firme konvikshon ku pensa mas leu ku frontera i atendé konhuntamente ku nos asuntunan, tin balor i ta ofresé bentaha pa tur parti di nos Reino” asina Coffie a bisa. 

Amor

‘Kon doloroso ku e forma den kua nos struktura estatal a bira realidat por ta: awe nos ta biba huntu den un tipo di laso di kolaborashon internashonal ‘avant la lettre’, esta estilo prekursor. Asina gustosamente mi ke mira Reino komo totalidat i tambe e laso direkto entre Boneiru i Den Haag. I e laso di kolaborashon akí, meskos ku Hulanda den Benelux i Union Oropeo, tin mester di un poko amor i un poko mantenshon.