KRALENDIJK- Sikólogo Harald Linkels riba djadumingu a skibi un editorial pa Bonaire.nu kaminda e ta kuestioná e lòbimentu pisá ku ta adando di parti di Dutch Caribbean Airline Association (DCAA) i gobièrnu di Hulana pa introdusí avionnan eléktriko pa bula primeramente entre Aruba, Boneiru i Kòrsou.

“Tur hende ku tende nan argumentu, manera ku esaki ta mihó pa medio ambiente, ku e avionnan lo ta mas barata pa operá i ku tur prèis di pasashi lo baha ta zona bunita, pero alabes tambe ‘too good to be true’, manera sa bisa.

Según Linkels, e meta prinsipal di aeropuerto mester ta ku pasahero por baha di un manera efisiente, ku nan tin un eksperensia plasentero ora di abordá òf ora ta desembarká, i ku seguridat ta sigurá. “Pero ora ta trata di e transporte mes, di A pa B, realmente nan no tin nada di bisa”, según Linkels.

Linkels ta mustra tambe riba e echo ku na e parti Karibense di Reino semper kosnan ta bai diferente for di a parti Europeo. “Bo por imaginábo ku na Hulanda Schiphol of Groningen Airport Eelde por bin dikta pa KLM òf TUI ta ku ki avión nan tin ku bula”? Esaki nan no por ni kuminsá pensa.

Eksküs

Linkels ta mustra riba e peliger ku ta eksistí ku ta enfoká asina tantu riba e bentaha di bulamentu ku avion eléktriko, ku ta keda sin wak i atendé ku e problema real dikon pasashi ta asina karu. “Impuesto riba pasashi, airport improvement fee, gastu pa hasi uso di e aeropuerto i pa stashoná avion i gastu pa nabegashon den e espasio áero. Ta tur esakinan ta pone ku pasashi ta bira impagabel. Ni tantu e operashon di e avionnan aktual”.

Komo ehèmpel por wak e situashon di un pasashi entre Kòrsou i Aruba, ku tin mas di 100 dòler na impuesto. Esaki ta mas ku un terser parti di e preis di e pasashi.

Linkels ta teme ku hinter e diskushon tokante avion eléktriko tambe ta manera un eksüs perfekto pa Den Haag, pa no atendé ku e problemátika di prèis di pasashi aktual. “Ya pa tres aña tin un rapòrt trahá bou di liderazgo di èks direktor di KLM, Peter Hartman ku a proponé pa supsidiá un kantdiat di pasashi limitá pa aña pa hende ku ta biba na Boneiru, St. Eustatius i Saba. “Pero esaki tin ya tres aña drumí na Den Haag, kaminda ku kada bes ta buska otro eksküs pa no atendé ku e asuntu. Awor a bin ku e idea ku na aña 2026 lo por biaha ku avion eléktriko, tur atenshon ta bai na esei. Kaminda no tin ningún garantía ku di bèrdat e ora ei bulamentu lo bira mas barata.

Linkels ta mustra riba e echo ku hopi di e avionnan ku lo por transportá pasahero ainda ta den fase di diseño i asta eksperimental. Tampoko ta konosí kiko nan lo kosta, kuantu gastur operashonal lo tin, kuantu tempu e baterianan lo dura ètsetera.

Impuesto

“Si realmente e aeropuertonan ta asina preokupá pa baha prèis di pasashi, laga nan kuminsá baha esaki for di awor pa biahe entre nos islanan. Esaki por sosodé mañana si nan ke. No tin mester di warda te aña 2026 pa e avionnan eléktriko ku supuestamente lo bai yega”, asina Linkels a konkluí.

Linkels den su editorial ta referiendo tambe na un estudio ku a keda hasí pa Caribbean Development Bank (CDB) ku a konkluí ku impuesto i otro sobrekargo poko poko ta matando aviashon den region karibense.