ORANJESTAD, St. Eustatius- Dos ‘grandi’ den polítika di Kòrsou i dos èks promé minister di e pais Antia Hulandes ta bai media na St. Eustatius den un konflikto entre Kolegio Ehekutivo i Konseho Insular di e isla.

E konflikto tin su orígen den e intervenshon polítiko ku Hulanda a hasi na aña 2017. Miembronan di konseho insular ta reklamá ku e komisarionan di Reino, nombrá pa Hulanda, no ta yudando pa regresá na demokrasia kompleto riba e isla.

Aunke ku na aña 2020 a tene un elekshon general, Konseho Insular kasi no tin poder riba e isla. Moshonnan ku ta pasa, tin solamente e peso di un ‘rekomendashon’, ya e ku komisarionan di Reino por pone esakinan banda di nan.

Tampoko Konseho Insular no tin mag di nombra su propio diputadonan. Konseho Insular ta sinti ku e komisarionan di Reino ta aktua riba nan mes, sin konsultá ku konseho insular ora di tuma desishon, òf pa loke ta trata e término riba kua mester regresá na un gobièrnu propio riba e isla.

Mediashon

Despues ku Konseho Insular a adaptá un moshon pa yama pa intermediashon den e situashon, e buska dos mediadó den persona di èks promé ministernan Maria Liberia Peters (PNP) i Suzy Camelia-Römer (PIN). E dos mediadónan lo haña ayudo di e anterior ombudsman di Pais Kòrsou, Alba Martijn. Martijn ta wòrdu konsiderá eksperto den e diferente leinan ku ta aplikabel den e situashon aki.

Den e mediashon, Suzy Camelia-Römer ta e mediadó di parti di Konseho Insular, mientras ku Maria Liberia-Peters ta representá komisarionan di Reino, Alida Francis i Claudia Toet.