KRALENDIJK- KLM ta bai subi prèis di su pasashinan pa entre otro Boneiru, Aruba i Kòrsou. Esaki a keda konfirmá pa mènedjer di region di KLM na Kòrsou, Dirk Buitelaar.

E subida den prèis ta wòrdu okashoná pa un subida basta drástiko den prèis di petroli i su derivatonan, den kual tambe tin djèt fuel.

E prèis pa loke ta trata pasashinan pa buelonan di Amsterdam pa Aruba, Boneiru i Kòrsou, lo subi ku 35 dòler pa un pasashi ida i buèlta, i 25 dòler pa un pasashi di bai òf di bin so.

Pa loke ta trata asientonan den e klase ehekutivo, esaki ta mas o ménos 110 dòler pa un pasashi bai bin, i mas o ménos 80 dòler pa un pasasi ‘one-way’.

Tui

E aerolínea Tui ainda no a komuniká ku e lo bai subi prèis pero esaki ta parse un kestion di warda, pasombra ta rònt mundo aerolíneanan ta subiendo prèis pa pasashi òf ta reintrodusí un ‘sobrekarga pa fuel’, manera a yega mira den pasado.