KRALENDIJK- Djasabra 19 di mart último Partido Demokrátiko Boneriano a konvoká un reunion general pa su miembronan. E motibu prinsipal pa yama e reunion tabata pa skohe, konforme statuto di partido, un direktiva nobo.

 Durante di e reunion general di Partido Demokrátiko Boneriano, kual a tuma lugá na e edifisio di ABVO djasabra dia 19 di mart último, miembronan a skohe un presidente nobo, 8 miembro di direktiva i 4 miembro di direktiva suplente. Pa e puesto di presidente di partido a skohe señor Peter Silberie. Miembronan a aprobá nombramentu di señor Silberie komo presidente di Partido Demokrátiko Boneriano unánimemente. E otro 8 miembro di direktiva ku a keda nombrá ta Edson Frans, Caroline Cicilia, Micheal Pieters, Verna Bernabela, Julien Kops, Niyana Faneite, Sendion Balentin i lider polítiko Clark Abraham. Komo ku tabatin mas kandidato ku a postulá nan mes, a nombra 4 miembro di direktiva èkstra komo suplente. E personanan aki ta Alsi Anthony, Eric Delanoy, Rolanda Hellburg-Makaai i Ruvieni Rodriguez.

Kontentu

Tur presente tabata hopi kontentu i satisfecho ku e direktiva nobo i ala bes a gradisí e direktiva saliente pa nan esfuerso i trabounan durante e temporada tras di lomba. Di akuerdo ku e presidente nobo señor Peter Silberie: “Tin hopi trabou, i a yega tempu pa un kambio! A yega tempu pa e pueblo di Boneiru wòrdu trata igual i risibí mesun benefisionan ku un hulandes europeo ta risibí na Hulanda. Al final ta pa e motibu aki nos ta parti di Hulanda”.

 Mester di kambio

Durante e anochi tabatin diferente otro oradó ku a trese e dolónan di e pueblo di Boneiru dilanti, i na mes momento a enfatisá ku mester bini ku un KAMBIO. Na final di e reunion e presidente nobo Peter Silberie a hasi un petishon na tur miembro presente pa uní i traha konhuntamente na e kambio ku nos tur kièr mira.