KRALENDIJK- EZ Air ta den un komunikado di prensa djarason a bisa di ta trahando riba optimalisashon di efisiensia, awor ku a kaba di bende e dos avionnan Beechcraft 1900D i a remplasá esakinan ku dos avion mas grandi di e tipo Saab340. 

E avionnan nobo, ku kada un tin 34 asiento, ta konsiderablemente mas grandi ku e Beechcraftnan, ku tabata tin un total di 18 stul pa avion. Di e manera aki, EZ Air den un tempu relativamente kòrtiku a logra di kasi redoblá e kantidat di asiento ku e ta ofresé riba e rutanan entre e islanan. 

E kompania ta hopi satisfecho ku e avionnan Saab. “E avionnan aki a resultá hopi konfiabel, di moda ku tin ménos buelo ku ta sea sali ku retraso òf ta kai afó”, asina direktor di EZ Air, René Winkel, ta bisa. Tambe e kompania di aviashon ta risibiendo hopi komentario positivo tokante e avionnan nobo. “Nos pasaheronan ta gusta e avionnan aki pa motibu di ta hopi espasioso. Tambe awor aki kasi no ta pasa mas ku mester laga maleta atras pa motibu di peso, ku ta algo hopi importante”, asina Winkel a bisa. 

Mantenshon

Tòg, segun EZ Air a sigui bisa, tras di kòrtina ta sigui traha riba mas optimalisashon den e operashon. Tempu ku EZ Air a kumpra e avionnan Beechcraft a stashoná un avion na Boneiru, i un na Kòrsou. E manera di traha aki, ta trese sierto reto kuné, en bista di e echo ku mantenshon ta tumando lugá na Kòrsou. “Ya ku e mantenshon di e avionnan ta sosodé na Kòrsou e sistema aktual ta trese reto kune pa nos departamentu di mantenshon. Tin biaha nos tin ku trese tripulashon di Boneiru pa Kòrsou òf di Kòrsou pa Boneiru, ku tur su konsekuensianan pa e operashon”, asina Winkel ta splika. 

Riba petishon di departamentu tékniko, den futuro serkano ámbos avion lo bai pasa anochi na Kòrsou, di forma ku por ehekutá mantenshon den oranan di anochi. Segun Winkel, ta spera mas efisiensia di e manera di traha aki. Pa e pasahero esaki lo no tin ningun konsekuensia. E úniko diferensia ta ku e avion lo sali di Kòrsou pa bin Boneiru mainta trempan, promé ku e sigui kubri e sobra rutanan pa e dia. 

Piloto

Un desbentaha di e forma nobo di operá si ta ku mayoria di e pilotonan di Beechcraft ku ta biba na Boneiru ainda, lo mester bai stashoná na Kòrsou por lo pronto. “Pero nos ta kere ku e bentahanan lo ta mas grandi ku e desbentahana”, asina Winkel ta bisa. 

Tambe e kompania a bisa ku nan ta trahando tambe pa trese un di tres avion di marka Saab abou. “E avion aki lo fungi prinsipalmente komo avion di reserva, si un di e dos otro avionnan tin un desperfekto tékniko. Di e forma aki, EZ Air ta purba limitá retraso òf kambio di orario na un mínimo”, asina EZ Air a komuniká.