KRALENDIJK- Konseho insular lo mester bolbe bai vota tokante e ordenansa pa introdusí un impuesto pa turista ku ta drenta e isla. 

Esaki ta konklusion di grifir Shuzelle Pieter, den un karta ku ela skibi pa gezaghèber Edison Rijna. Segun Pieter a bisa, tin mucho espasio pa interpretashon den e lokual ku a wòrdu disidí. E situashon a surgi ora ku partidonan di koalishon a bin ku amienda riba e proposishon original. Al fin no tabata kla riba ku teksto eksaktamente a vota. Lider di oposishon, Clark Abraham, ku komo úniko a kapta e eror ku tabata kometiendo a purba spierta e partidonan, pero niun no ker a skucha. 

Awor, segun Pieter a skibi pa Rijna, e úniko opshon ku ta resta ta pa bolbe vota riba e proposishon, di forma ku ta kla kua teksto eksakto a wòrdu aprobá. Segun ta komprondé den e teksto ku a ratifiká awor aki no tin nada di tarifa spesial pa studiante di e isla ku ta bin Boneiru pa pasa fakansi. Tampoko no tin klaridat riba e echo si turista lo mester paga e impuesto pa kada bes ku nan drenta, sí òf nò. 

Arogansia

Abraham mientrastantu ta mira e forma di proseder komo muestra di arogansia di parti di e partidonan di koalishon.