KRALENDIJK- Miembro di Konseho Insular, Daisy Coffie resientemente tabata di bishita na Cargill pa pone su mes na altura di aktividatnan di  e kompania ku ta produsí salu akí na Boneiru pa e último 25 añanan for di aña 1997. 

Cargill tin un área di Boneiru basta grandi (13%) bou di su maneho. E kòntrakt di èrfpagt ku Entidat Públiko Boneiru (EPB) tin ku Cargill ta terminá pronto na aña 2024 i manera Sra. Coffie mes a bisa e ke pone su mes na haltura kiko ta pasando pa ora e diskushon subi mesa e sa di kiko e ta papia. “Na promé lugá nos a haña un splikashon amplio tokante e aktividatnan rònt mundu di Cargill, esta e diferente sektornan i diferente paisnan (mas ku 70) ku nan ta operashonal den dje. Pa loke ta trata Boneiru nos a haña un splikashon di e área i nan diferente aktividat¬nan¬ i envolvimentunan den e área akí. Por ehèmpel Cargill ta enkargá ku e reserva di flamingo i ta sòru pa nan ta bon protehá”, asina Coffie a splika. 

Tereno

“Algu ku a hala atenshon ta ku tin tereno èrfpagt pero tin tereno propiedat tambe. E playa di Saliña konosí komo Pink Beach ta tereno privá di Cargill ku for di komienso di produkshon moderno di salu a  interkambiá ku gobièrnu pa e tereno kaminda e kasnan di katibu ta. E kaminda di turista na parti sùit ta pasa parsialmente riba tereno di Cargill”, asina Coffie a opservá. 

Tambe Coffie a haña splikashon di e diferente maneranan ku por produsí òf mina salu, kompará ku esun ku ta apliká akí na Boneiru. E área, e sitio, e ubikashon na laman i e wer tur ta kontribuí na un situashon per-fekto pa kosechá salu akinan. 

Produkshon i empleo

E salu ku ta produsí na Boneiru ta di hopi bon kalidat, no pa konsumo pero pa uso industrial. Ta us’é pa ‘home water softeners’, tinzjamentu den industria tekstilero i pa prosesá den industria petrolero. 

Na Salt Company tin mas òf ménos 40 empleado ta traha anto ku mas òf ménos 30 empleado ta traha via kontratista’, asina konsehal Coffie a trese dilanti. 

Aporte

“E aporte di Cargill na Boneiru ta trabou i tur e kontribushonnan ku esaki ta bin kuné manera impuesto riba suèldo (loonbelasting) i otro primanan. Tin alabes e kontribushonnan pa medio di e servisionan ku terseranan ta duna na Cargill. Tambe pago di èrfpagt i impuesto riba propiedat ta kontribushon¬nan na kaha di gobièrnu. Tur aña Cargill ta kontribuí ku  desenas di míles di dòler na nos komunidat, asina Coffie a nota. 

Tambe Coffie a konkluí ku Cargill ta kontribuí na e isla via di entre otro konservashon di naturalesa, seguridat di kuminda i kultura.