KRALENDIJK- Konseho Insular riba djaweps no a vota un di dos biaha riba e ordenansa pa introdusí un sistema nobo pa impuesto riba turista. 

Un di dos voto a bira nesesario, ora a resultá ku tabata tin bruashon pa loke ta e teksto eksakto di e ordenansa, ku a aprobá. Basá riba esaki grifir di Konseho Insular a konsehá rat pa bolbe ripití di vota riba e ordenansa. 

Esaki sin embargo no a wòrdu hasí ainda pa djaweps, ora no a logra pone tópiko riba agenda di Konseho Insular. 

Malkontentu

Spesialmente líder di e Frakshon di PDB, Clark Abraham, no ta mashá kontentu ku hinter e situashon. “Mi ta tuma nota ku TCB ta aktivamemente komunikando tokante e ordenansa nobo aki, kaminda e no wòrdu ratifiká ainda pa Konseho Insular. Tanten ku no a aprobá e ordenansa nobo, ta esun bieu ta keda na vigur”, asina Abraham a trese dilanti. Gezaghèber Edison Rijna no tabata tin ningun otro opshon di duna Abraham razón ku su ponensia. 

Ainda no ta kla, ki día sí lo vota di nobo riba e lei nobo. Por a nota ku ambos diputado Hennyson Thielman i James Kroon no tabata tei presente, pa motibu di biahe den eksterior. Thielman ta e diputado ku a prepará hinter e trayekto pa e lei nobo di impuesto pa turista drenta na vigor.

Diskushon

Sin embargo, ora e konsepto a wòrdu tratá den konseho insular, e órgano aki a disidi di no solamente hisa e montante proponé ku 50%, pero tambe a stipulá ku un turista mester paga esaki no un biaha pa aña, manera e proposishon original tabata menshoná, si no kada bes ku e turista drenta mester paga esaki di nobo.

Hinter e asuntu a kondusí na un diskushon bastante fuerte entre proponente i oponente di e sistema nobo.