KRALENDIJK- E direktor di Fundashon Cas Boneriano (FCB) Ben Oleana den un karta dirigí na Kolegio Ehekutivo ta boga pa implementashon di un Ordenansa di bibienda na Boneiru. 

Un ordenansa asina lo mester frena e desaroyo negativo ku tin aktualmente riba e merkado di bibienda na Boneiru. Segun Oleana por a konstatá ku den último añana e poblashon di Boneiru a krese di forma rápido, ku ta pone ku tin mester di mas. “Si e poblashon ta sigui krese manera e ta krese awor aki, pronto lo tin preshon riba áreanan di naturelasa, simplemente pasombra tin mester di mas lugá pa konstruí kas. Esaki ta indeseabel pasombra naturalesa ta un di e poko rekursonan natural ku Boneiru tin pa ofresé. Sin naturalesa, tampoko no tin turismo”, asina Oleana ta nota den su karta. 

Kompetensia

Tambe Oleana ta mustra riba e echo ku bibiendonan ku de echo ta bibiendonan normal pa poblashon, mas i mas ta wòrdu kumprá pa estranheronan komo obheto di invershon, i pa despues hür esaki ku turista. Esaki ta pone ku hopi Boneriano ta wòrdu desplasá i mas i mas hende no por afòrt di tin un kas na Boneiru. 

Ordenansa

Segun Oleana, implementashon di un ordenansa lo por yuda aliviá e situashon, den sentido ku pa medio di un ordenansa por eksigí un pèrmit di doñonan di kas pa por hür un kas ku propósito turístiko. Según Oleana ta nota tambe, ku no mester inventá e wil di nobo, pasombra ya tabata tin un konsepto pa un ordenansa asina for di basta aña bèk, pero no a implementá esaki nunka. Según Oleana, ya ku e situashon a kambia lo mester hasi sierto adaptashon si na un konsepto di Ordenansa di bibienda, pa asigurá ku e ta pas ku e situashon di awor.