KRALENDIJK- Den e promé kuartal di 2022 e produktornan di webu a hasi un súplika pa adaptá preis di benta por menor i benta por mayor di webu di galiña produsí lokalmente. Den nan súplika nan ta indiká ku mayoria preis di materia prima pa produkshon di webu di galiña a subi enormemente i ku nan lo sigui subi tur luna. 

Ta trata prinsipalmente di preis di kuminda pa galiña, puitu, empake di webu i gastu di transporte. E produktornan lokal di webu a indiká ku nan no por tin kontròl riba e desaroyonan aktual di preis, den e kaso akí oumento di preis di medionan di produkshon, spesialmente pa motibu di e guera na Ukraina i oumento di preis di kuminda pa galiña komo konsekuensia direkto di esaki.

Temporal?

Ku e meta pa mantené e proseso di produkshon lokal den tal forma ku e ta kubri gastu i pa mantené webu di galiña pagabel pa konsumidó, Kolegio Ehekutivo a disidí pa entrante 16 di mei 2022 temporalmente oumentá e preis di benta por menor pa webu produsí lokalmente ku 75 sèn. Despues di 3 luna lo evaluá e medida temporal akí. 

Durante e periodo akí Entidat Públiko Boneiru ta spera di haña un bista kompleto riba desaroyo di gastu di produkshon di webu den e periodo di 2017 te ku 2021. E preis di benta por menor pa webu importá no ta kambia.

Preis

E preis nobo pa un dozèin di webu produsí na Boneiru den tiendanan lo ta di 3 dòler ku 53 sèn.