KRALENDIJK- Segun lider di Partido Demokrátiko Boneriano, e manera ku a skohe un provedor pa e programa pa kobra e impuesto pa turista, no a kana di forma transparante. Esaki Abraham a trese dilanti di reunion públiko ku a tuma lugá djamars anochi. 

Abraham a referí na un karta skibí pa e ofisina di abogado Van Eps na number di Stichting Waddenkaart, kaminda nan ta bisa ku e manera ku e destaho públiko pa desaroyo di e sistema no a kanda segun stipulashon di lei riba e punto aki. Abraham a kritiká tambe e echo ku te awe no por a duna ni sikiera number di e kompania ku a selektá pa hasi e trabou ei. 

A resultá ku diputado Thielman tampoko no por a kompartí e informashon aki, pasombra segun ela bisa, e tampoko no tin esaki. Thielman a bisa ku lo pidi direktor di TCB, Miles Mercera pa manda e informashon aki. E kontesta di Thielman a kondusí na iritashon serka Abraham, ku a rekòrda e diputado ku ta e ta hefe di Miles Mercera, i no vise versa. 

Keho

Awor.nu sa di por lo ménos dos provedor ku no ta konforme ku e manera ku e sistema di destaho públiko a tuma lugá. Tambe ta tilda TCB di a usa informashon i trabounan preparativo di sierto provedó, pa finalmente duna e kontrakt na otro kompania. 

Informashon kompleto

Abraham a pidi diputado Thielman pa esaki manda tur informashon ku tin disponibel pa ku e proyekto aki, inkluyendo e kriterionan ku a apliká for di prinsipio pa por hasi un eskoho, nòmber di tur kompania ku a manda un oferta aden, i a base di kiko a hasi e eskoho final. Tambe Abraham ke sa kiko ta e gastunan mará na e sistema pa kua a skohe.