KRALENDIJK- Miembro di konseho Insular, Daisy Coffie, di Frakshon Coffie ta para stret tras di diputadonan Nina den Heyer i Hennyson Thielman, pa loke ta traha nan oposishon kontra di e permit pa konstrukshon di Sunset Beach Resort. 

Coffie, durante reunion di Konseho Insular djamars ku a pasa,  a bisa di ta lamentá e falta di unidat den gobièrnu di Boneiru. “Pa mi ta hopi kla, zo klaar als een klontje, manera ta bisa na Hulandes, ku no tin unidat riba e puntu aki”, asina Coffie a trese dilanti. Coffie a bisa di ta lamentá tambe e echo ku gezaghèber no a hasi uso di instrumentonan ku e tin, pa trese e unidat aki. 

Coffie tambe a kritiká e echo ku ke bolbe desvia for di normanan eksistente, ora ta traha di Sunset Beach Resort. “Si nos ta keda desvia for di regla, laga nos desvia e ora ei pa tur hende ku tin un petishon pa permit i ku no ta kumpli ku e rekesitonan, manera siudadano ku ta wardando un permit di gobièrnu”, asina Coffie a bisa. 

Sosten

Coffie a bisa hopi kla tambe ku e ta pará tras di e diputadonan di MPB den e kaso aki. “Mi a yega di bisa ku den e BC aki, ami ta sostené diputado Den Heyer. Pero den e kaso aki, mi ta sostené diputado Thielman tambe”, asina Coffie a bisa.

Coffie a remarká tambe ku e no ta haña ku un desaroyo manera esun di Sunset Beach Hotel ta pas na Boneiru. Nos mester keda ku nos autentisidat komo isla. Hotelnan ‘high rise’, manera esnan na Miami simplemente no ta pas na nos isla”, Coffie a konkluí.