TCB a skohe IBIS Management Associates, establesá na Kòrsou, pa diseñá sistema pa kobra impuesto di turismo. Segun TCB den sèptèmber aña pasá a hasi un petishon públiko pa proposishon (request for proposal – RFP) na empresanan riba tereno di inovashon i teknologia digital i di informashon pa desaroyá un plataforma online pa kobramentu di e impuesto di turista nobo ku nan a proponé (pa no-residentenan). 

TCB ta bisa di ta kontentu di por partisipá ku diferente empresa riba tereno di inovashon i teknologia digital i di informashon for di nos region, for di Oropa i for di Merka a mustra interes i a mèldu nan mes pa forma parti di e RFP ku a keda publiká, dentro di e ‘deadline’ di 8 di òktober 2021. 

TCB a instalá un komishon interno di vários representante profeshonal pa selektá e mihó partner pa e trabou a base di un lista fiho di kriterio, manera a keda publiká den e RFP. 

Eskoho

Segun TCB e eskoho pa IBIS Management Associates ta basá riba un konosementu amplio di prosesamentu di pago direkto. IBIS su punto fuerte tambe ta e nesesidat di reportahe di institutonan finansiero i empresanan i suministro di solushonnan ku fásilmente por keda integrá den e sistemanan núkleo i prosesonan empresarial eksistente. IBIS ta duna servisio na mas ku 40 instituto finansiero i empresa den área karibense i Amérika Sentral i Suramérika i nan a akumulá un sírkulo di kliente bankario fiel riba henter mundu. 

Krítika

A pesar di e komunikado positive di TCB pa loke ta traha eskoho pa IBIS komo provedó di e sistema nobo, tin basta krítika riba e maner ku e proseso a kana, ámbos den seno di Konseho Insular, komo pafó di Konseho Insular. 

Entre otro e Fundashon Stichting Waddencard ta bisa ku TCB a hasi uso di informashon ku e fundashon a provee, pa finalmente sera un kombenio ku un kompetidó. Tin sonido di otro provedó potensial ku no a keda kontentu ku eskoho di TCB.