KRALENDIJK- Djaluna anochi durante reunion di Konseho Insular konsehal Clark Abraham a hasi un kantidat di pregunta skèrpi tokante konstrukshon di un fábrika di blòki sin ku tin un permit pa esaki. 

Pa hasi e asuntu aun mas fastioso ta e echo ku ta konstruyendo e fábrika den un área ku ta destiná pa aktividatnan agrariko. 

Gezaghèber Edison Rijna a respondé ku mientrastantu gobièrnu a manda karta pa Caribbean Blokken en Klinkers Fabriek pa ordená esakinan pa para e trabounan, mientrastantu ku no tin permit. 

Abraham di su banda a protestá kontra djis e paramentu di e konstrukshon. “Si no tin permit, ni no a pidi permit ainda, dikon no ta ordená e kompania en kestion pa demolí te asina leu?” Abraham tabata ke sa di Rijna. Segun Abraham no por sigui tolerá aktividat ilegal sin ku esaki tin konsekuensia pa esun ku ta hasi esaki.

Hòmber chikí

Abraham a bisa tambe ku e ta lamentá ku ta kousando e impreshon ku si ta e hòmber chikí ku ta konstruí sin permit si ta duma medida drástiko, pero si ta trata di komersiante, einan si ta duna nan tur kaminda di kana. 

Rijna na su turno a bisa ku a ‘handhaaf’ dor di pone un paro na e troubounan i ku por lo demas e lo no por a kontestá masha pregunta. Segun Rijna a bisa tambe, lo mester hasi otro pregunta adishonal na e diputado ku ta bai tokante permit. 

Abraham a keda para riba su puntu ku ta gezaghèber ta esun ku tin ku mantené regla i òrdu anto ta e ta esun ku mester tuma akshon. E instistensia di Abraham, a kousa un iritashon visible den gezaghèber ku a keda ripití su mes. 

Pa falta di sufisiente tempu den kuadro di e ‘vragenuurtje’ no por a sigui elaborá riba e topiko, pero ta hopi kla ku konsehal Abraham no ta satisfecho ni kla ku e fail aki.