KRALENDIJK – Autoriteit Consument & Markt (ACM) a fiha e tarifanan máksimo pa distribushon di koriente na Hulanda Karibense. E tarifanan lo oumentá konsiderablemente for di 1 di yüli 2022, dor ku ta usa kombustibel fòsil pa produkshon di koriente i e prèis di gasolin a subi drástikamente. 

Kada aña, na desèmber, ACM ta establesé e tarifanan máksimo pa produkshon i distribushon di koriente na Hulanda Karibense. Pa tene kuenta ku e fluktuashon di prèis di gasolin, ACM ta ahustá tarifanan máksimo for di 1 di yüli, si esaki ta nesesario. Provedornan energétiko, a base di e tarifanan máksimo aki, ta determiná e tarifa ku nan ta kobra habitante i kompanianan. 

Supsidionan

E oumento di e preisnan di gasolin tin un impakto signifikativo riba e fakturanan di koriente doméstiko na e islanan Hulanda Karibense. Pa e motibu aki gabinete for di 2022 a pone supsidionan disponibel pa sostené forsa di kompra. 

Boneiru

Pa Boneiru, e tarifa máksimo di uso variabel lo oumentá di 0,3260 USD/kWh pa 0,4253 USD/kWh. E tarifa máksimo di Pagabón (prepago) lo oumentá di USD 0,5332/kWh pa USD 0,6325/kWh. Pa e promedio di konsumo doméstiko na Boneiru esaki ta nifiká (un oumento di aproksimadamente USD 25 pa luna).

Sint Eustatius

Pa Sint Eustatius, e tarifa máksimo di uso variabel lo oumentá di 0,3553 USD/kWh pa 0,4306 USD/kWh. Pa e promedio di konsumo doméstiko na Sint Eustatius esaki ta nifiká (un oumento di aproksimadamente USD 19 pa luna).

Saba

Pa Saba, e tarifa máksimo di uso variabel lo oumentá di 0,4093 USD/kWh pa 0,5195 USD/kWh. Pa e promedio di konsumo doméstiko na Saba esaki ta nifiká (un oumento di aproksimadamente USD 28 pa luna). 

Mas informashon

Habitantenan ku tin pregunta tokante e ahuste di tarifanan di koriente por tuma kontakto ku Autoriteit Consument & Markt (ACM). Bo por haña mas informashon tokante e medidanan pa sostené forsa di kompra riba e wèpsait di Rijksdienst voor Caribisch Nederland.