WILLEMSTAD – Produkshon di webu ta na peliger na Kórsou. E produkshon ta stagná pa motibu di gastunan haltu di kuminda i transporte. Ku e maneho di preis aktual ta difísil pa saka e gastunan bek.

Un kaha di djesdos webu ta kosta ya pa djeskuater ana fl. 4,88. Komo ku webu ta forma parti di e makutu  básiko, kriadónan di webu no por hisa nan preis. Pero e gastunan si ta subi. Nan ta subi asina tantu ku asta tin un gran kantidat di kònteiner ku no ta pagá i  ta pegá den haf.

Jose Duvale di Eierfarm Moderno ta splika Extra  ku tin kuminda pa un siman so pa e galiñanan. Si no sosodé algu rápido e galiñanan ta muri i produkshon di webu ta para. E kriadó di galiña tin 100.000 galiña den stal i ta produsí normalmente 60.000 webu pa dia. Pa motibu di e problemanan aki e kantidat a redusí te na 12.000 webu pa dia.

Minister Ruisandro Cijntje di Desaroyo Ekonómiko ta bisa ku e por hasi algu na e preis, pero ta deseá si di mira sifranan anual di e kriadónan di galina.