AMSTERDAM – Minister Hulandes pa Protekshon di Derecho Franc Weerwind a defendé e liña di tempu pa reorganisá e sistema di wega di plaka na Kòrsou i ta mustra riba e progreso ku e isla ta hasi na momentu di introdusí e reorganisashonnan ku gobièrnu Hulandes ta pidi.

Reglamentunan di lei nobo lo hisa e barera di atmishon, ku komo konsekuensia ku lo ekskluí sierto operadónan forsosamente, pero minister di Finansas Javier Silvania ta bisa ku e operadónan ku no por kumpli ku e normanan nobo, lo no ta un gran pèrdida.

Den un reakshon riba preguntanan di Kamer, minister Weerwind a bisa ku gobièrnu Hulandes ta trahando kaba ku Kòrsou pa aktualisá e sistema di wega di plaka. Hulanda ta mara ayudo di Covid-19 entre otro na reorganisashon di e sistema di wega di plaka online na Kòrsou i ta eksihí mas transparensia i un outoridat real ku ta otorgá permit.

“Esaki ta un preukupashon pa Hulanda i tabata entre otro e motibu ku e Landenpakket di Kòrsou ta kontené dos medida tokante di reorganisashon i modernisashon di henter e sektor di wega di plaka i mui en partikular e sektor di wega di plaka offshore online” e ta bisa.

El a agregá sinembargo ku Hulanda no por imponé su propio reglanan riba Kòrsou i na su lugá mester warda riba medidanan pa por pasa e proseso di reglamente di lei.

Na ora di kontestá na Kamer minister Weerwind a diskutí tambe tokante di Aruba i Sint Maarten, e dos otro paisnan di reino. Aruba tin un supervisor ku ta kontrolá kasinonan, mientras Sint Maarten no tin supervisor mes. E minister ta sigui bisa ku “ambos pais ta tumando akshon pa pone un supervisor pa tin kòntròl riba henter e sektor di wega di plaka”.