WILLEMSTAD – E barku di entrenamentu ARC Gloria di marina Kolombiano ta hasi un bishita ofisial na Kòrsou fin di e luna aki. Den fin di siman di djasabra 30 di yüli te ku djaluna 1 di ougùstes e barku lo ta mará na pir Mathey. 

Durante sierto orario den e wikènt ei e barku lo ta atmití públiko pa subi e barku. Pa sierto motibunan e barku ku tres master aki no por a forma parti di e flota durante Velas Latinoamérica 2022 na Kòrsou.

Durante e evento Velas Latinoamérica di 2018 si e barku aki tabata presente. Na e okashon ei a honra ARC Gloria ku entrega di e prestigioso Jacob Gelt Dekker Award di e aña ei, pasobra nan tripulashon tabata esun ku a hasi mas tantu esfuerso pa trese e pueblo i e tripulantenan mas serka di otro. 

ARC Gloria ta un barku ku tres master ku ta e barku di komando ofisial di marina Kolombiano i ku tin porta di Carthagena komo su base. Na 1966 gobièrnu Kolombiano a duna ordu na konstruktor di barku Celaya na Bilboa pa konstrui e barku eksepshonal aki. Un aña despues a konstruí e barku aki i e otro aña despues a bah’é na laman.

E nòmber di e barku ta derivá di e himno nashonal di Kolombia, ‘Oh Gloria inmarcesible’.

ARC Gloria ta 67 meter largu i tin un superfisie total di bela di 1400 meter kuadrá. Por katalogisá e barku den e mésun kategoria ku e barkunan medio ruman Simón Bolivar di Venezuela, Cuauhtémoc di Mexico i BAE Guayas di Ecuador. Cuauhtémoc tabata luna pasá den bahia di Kòrsou durante Velas Latinoamérica 2022.