WILLEMSTAD – Gobièrnu di Kòrsou ta lamentá opinion di gobièrnu Merikano tokante esfuersonan ku  pais ta hasi den lucha kontra trafikashon di hende. Ayera Washington a pone Kòrsou un stap mas abou riba e lista di klasifikashon den Trafficking in Persons-report 2022

Kòrsou ta pará tres aña largu riba un puesto ku ta mustra ku e pais por mihó, pero tambe tabata tratando pa presta mihó, e asina yamá Tier 2 Watchlist-status. Desde ayera Kòrsou ta pará na tier 3. E status ei ta nifiká ku Kòrsou no ta kumpli ku e normanan mínimo, pero tampoko no ta hasi esfuersonan signikativo pa kumpli ku esei.

Minister Hato di Hustisia ta bisa den un reakshon ku e no ta rekonosé su mes den e bahada pa Tier 3, pasobra gobièrnu ta hasi esfuersonan enorme pa lucha kontra di trafikashon di hende

Asina por menshoná ku a duna diferente treinen, a tene reunionnan i a hiba kampañanan di konsientisashon pa kombatí trafikashon di hende. E minister no ta reakshoná riba puntonan spesífiko ku e rapòrt TIP ta trese dilanti.