SCHIPHOL – KLM a hasi un yamada na biaheronan ku ta yega Schiphol pa no biaha ku maleta. E yamada aki no ta konta pa pasaheronan ku ta biaha for di Aruba, Kòrsou, Boneiru i Sint Maarten via Amsterdam pa un otro destinashon.

Si e destinashon final ta Amsterdam òf ora pasaheronan ta bula di Amsterdam pa un otro destinashon, lo no tin problema segun e bosero di KLM.

Esun ku ta biaha awe ku solamente ekipahe di man, ta krea asina espasio pa manda e maletanan ku ayera a keda atras pa motibu di un desfunshonamente di e sistema di ekipahe di Schiphol.

Últimamente ekipahe ta un problema grandi na Schiphol, kaminda hopi maleta ta keda atras. E último periodo pasaheronan tabatin hopi molèster di retraso, kanselashon, ekipahe ku a pèrdè i tempunan largu di espera. Esaki ta e kaso tambe na otro aeropuertonan Oropeo.