WILLEMSTAD – Heineken i Distribier Kòrsou ta alertá konsumidónan na Kòrsou ku por tin pida pida glas den bòternan di serbes. Ta trata di bòternan ku tin un dòpi ku ta skruf di e sortonan Original Pure Malt Lager, 0.0 en Silver. 

E importadó ta bisa ku ta importá e bòternan ku dòpi di skruf sin pèrmit via kanalnan no ofisial. Na Hulanda ta bende e bòternan konserní por mayor, den supermerkado, den pakusnan ku ta bende bibida i via internèt

E posibilidat ta eksistí ku e pida pida glasnan ta lòs for di e bòm di e bòter i ta resultá den e serbes. Ta trata solamente di e bòternan di 25 cl ku un kódigo di produkto spesífiko.

Bòternan ku no tin dòpi di skruf i ku ta importá via kanalnan ofisial no tin e problema ei.

Personanan ku a kumpra e bòternan ku e kódigo spesífiko por bai kambia nan serka e importadó Distribier Kòrsou.