WILLEMSTAD – Jandino Asporaat ta trese den ougùstùs su komedia humorístiko, titulá Perspectief, riba tarima. Su último biaha ku el a aktua na Kòrsou tabata tres aña pasá

E temporada di teatro último el a pasa rònt Hulanda ku su presentashon di un solo persona i esei ta haña un kontinuashon ku un gira mundial manera e mes ta bisa. E mundu ku e komediante ta referí na dje  ta Turkia, Boneiru, Aruba i Sürnam. Klaro ku e no por a laga su isla natal Kòrsou afó.

E tema di e presentashon aki ta wak bida for di diferente perspektiva. Jandino ta di opinion ku meramente den e bida aki ta nesesario pa wak asuntunan ratu ratu for di un otro perpektiva. ‘E berdat ta den bista di e oudiensia i ta dependé naturalmente si for di kua skina bo ta wak e. Ta bai bira un anochi bunita, mi a sinti bo falta, Kòrsou.’

Amantenan di Jandino por nota for di awó den nan agènda e fechanan djabièrnè 19 i djasabra 20 di ougùstùs 2022. Den Landhuis Brakkeput Mei Mei DJ Alex Sargo & DJ Willy lo sera e presentashon riba tur dos anochi ku un fiesta bailabel kombiná ku un Ban topa ku Jandino.

E komediante lo sera su gira mundial na Sürnam kaminda e lo aktua den un presentashon pa públiko riba 27 i 28 di ougùstùs 2022.