KRALENDIJK- M21 di Daisy Coffie e siman aki a para ketu na e evenemento rònt munda pa loke ta trata e asina yamá selebrashon di Pride. 

“Nos ta biba den un sosiedat diversifiká i kompleho ku representashon i partisipashon di diferente grupo di hende. E diversidat aki ta evidente den aspektonan manera orígen étniko, klase sosial, religion, abilidat físiko òf mental, género i tambe preferensia seksual”, asina Coffie a trese pa dilanti. 

Segun Coffie, pa nos por komprondé i relatá mihó na otro ta nos responsabilidat i deber síviko pa informá nos mes tokante temanan ku ta di importansia pa hustamente e gruponan minoritario den nos pais. Ademas di informá nos mes, nos meta mester ta pa krea un komunidat sigur, inklusivo, solidario i hustu pa un i tur. Asina nos por duna berdadero balor na e prinsipio di hustisia sosial. Pa e motibu aki, nos ke para ketu awe na e tema di e lucha pa derechinan di e komunidat LGBTQ+. 

Pride

Segun Coffie, E siman aki, di 30 di yüli te ku 7 di ougùstùs ta selebrá “Amsterdam Pride”, “Marchanan di orguyo” òf “Pride” ta manifestashonnan sosial di e movementu pa derechinan pa e komunidat LGBTQ+ i ta keda organisá na diferente siudat rònt mundu. E tradishon aki a kuminsá na Merka komo un akto di rebeldía i protesta, pero awendia ta un representashon mundial di balor i búskeda di igualdat sin eksklushon. Un di e ophetivo prinsipal di e manifestashonnan aki ta pa mustra i ekspresá ku orguyo e diversidat di orientashonnan seksual i géneronan ku ta eksistí; Pa laga mustra loke tradishonalmente ta wòrdu reprimí i trese e realidat di e komunidat aki dilanti. 

Ku e “Pride” ta otorgá tambe mas visibilidat na e komunidat LGBTQ+. Personanan ku ta parti di e grupo aki por sinti liber di mustra nan mes manera nan ta sin miedu pa represhon òf kritiká sosial. Den e manifestashonnan aki miem¬bronan di e komunidat LBGTQ+ ta ripará i sinti ku nan no ta nan so i ku tin hopi hende (ku no ta LGBTQ+) ku ta stima nan, ku ta defendé nan, ku ta respetá nan i tin masha hopi hende pa ken nan ta importante.

Igualdat i inklushon

Segun Coffie ta bisa, M21 ta para pa  igualdat, inklushon i no diskriminashon, nos ke  garantia di tur e derechinan humano; nos ta duna i alabes eksigí trato igual pa i na tur hende; asina un sistema balansa ta funshoná bon, asina un isla òf pais mester ta, ku trato igual pa un i tur. Toleransia i rèspèt ta e yabi.