ORANJESTAD – E bishita di trinta hóben di Aruba na Beringen na Bélgika ta kontinuá na Aruba. Djasabra e hóbennan di Beringen na nan turno ta biaha pa Aruba pa sera konosí ku kultura, músika i baile di Aruba.

E proyekto di baile a originá mediante un koperashon entre e studio di baile You Can Dance di Beringen i Club di Movimiento na Aruba den kuadro di Erasmus+, un proyekto ku Union Europeo ta supsidiá.

Bishita

E idea pa e interkambio a nase  aña pasá despues ku Marijke Dierick di estudio di baile di Beringen a hasi un bishita na Aruba.

“Mi a entamá e proyekto aki a konsekuensia di e krísis di korona i medidanan korespondiente ku a dal nos teenager- i hóbennan mentalmente hopi duru”, Dierick ta bisa.

“Na sèptèmber nos a haña komo grupo di baile kantidat di gritunan di ousilio di mayornan ku tabata wak nan yunan desaroyá pensamentunan dudoso i no kier a bin balia mas ni tampoko tabata motivá pa otro aktividatnan. Mi mes ta pedagogo di profeshon i kier a duna e mayor- i hóbennan aki un perspektiva i promové nan espíritu  di bida”.

Despues di su fakansi na Aruba i un kòmbersashon ku e skol di baile Club di Movimiento a resultá ku e hóbennan di Aruba ta luchando ku e mésun problemanan.

Entusiasmá

Nicole Oduber ta un dosente di baile hóben na Club di Movimiento i ta reflehá entusiasmá bèk riba e interkambio ku Erasmus+.

“Tur kos tabata fantástiko, ta un eksperensia ku mi no a eksperimentá nunka ainda, e ta realmente  enkantador  i algu ku mi lo keda kòrda pa semper. Bélgika ta un pais hopi bunita, enteramente otro ku serka nos. I Brugge tabata asina bunita. E hendenan tambe ta hopi amabel.”

Baliamente ta den sanger di hendenan na Aruba, un ekspreshon hopi usá ku Nicole ta konfirmá. “Nos tin diferente orígen kultural, pero tur hende ta balia si tur ora, ta un ekspreshon hopi usá ku ta bèrdat”, Nicole ta kontestá sonriendo.