WILLEMSTAD – Gobièrnu ta anunsiá ku e ta bai paga awor e último parti di e areglo di redundansia pa eks-trahadónan di refineria. Esaki ta un total di djesdos mion florin.

Gobièrnu a traha palabrashon ku e kompania di gobièrnu RdK pa loke ta trata e pago. Ta e intenshon ku Refineria di Kòrsou ta reklamá e montante aki i tambe e partinan anterior ku a paga e eks-trahadónan serka e eks- eksplotadó PdVSA.

Loke sea e resultado di e demanda ta lo paga e di sinku i último pago segun e palabrashonnan ku a hasi ku e sindikatonan di Isla.

Antilliaans Dagblad ta informá ku a palabrá ku ofisina di impuesto ku lo mantené un tarifa spesial di 34 porshento ku lo konta pa e areglo di redundansia ku lo paga e trahadónan den sinku biaha. 

E trahadónan ku a skohe pa laga depositá e sènnan aki den fondo di penshun di Isla òf otro kompania di seguro tabatin asta e posibildat pa hasi esaki liber di impuesto.