THE BOTTOM- Konseho Insular di Saba ta hopi krítiko pa loke ta trata e proposishon di lei ku minister Carola Schouten a manda pa e islanan BES dia 14 di yüli 2022. 

Na promé lugá Konseho Insular ke haña mas tempu pa studia e proposishon aki i duna un reakshon. Alabes lo ke reakshoná huntu ku Boneiru i St. Eustatius. Riba proposishon di konshelal Vito Charles i Carl Buncamper, Konseho Insular unánimamente a pasa un moshon ku e dos puntonan aki. 

Ounke a pidi mas tempu pa studia e materia, den promé instante e miembronan di Konseho Insular no tabata mashá positivo. “Nos tin 12 aña kaba ta bati na tur porta na Den Haag, pa loke ta trata e asina yamá mínimo sosial, sin ku nos por a yega na esaki”, asina Charles a bisa tokante e moshon. 

Falta di igualdat

Tambe Charles ta mustra riba e echo ku e proposishon di lei ta pone ku ta keda un diferensia hopi grandi den seguridat sosial na Boneiru, St. Eustatius i Saba na un banda, i Hulanda na otro banda. E diferensia entre e dos partinan na Hulanda, den e último 12 aña a oumentá so, asina Charles a trese pa dilanti. “E habitantenan di nos islanan ta wòrdu tratá manera siudadano di segundo rango, i esaki no ta aseptabel”, aina Charles a trese dilanti.