KRALENDIJK- MBO Boneiru ta bai haña un direktiva nobo, konsistiendo di dos persona. Ta trata di Liset de Keijzer i Lianne Dam.

Lianne Dam ta un nòmber nobo den direktiva di MBO Bonaire, pero no deskonosí den enseñansa. Durante e 12 añanan ku Dam ta biba na Boneiru, el a traha komo lider di tim na Fundashon Forma i komo kolaboradó di enseñansa i kuido di kalidat na MBO Bonaire. Ultimo sinku aña el a forma parti di MT i komo tal konosé tur desaroyo i plan. 

Liset de Keijzer tabata direktor di unidat na MBO Bonaire e último sinku añanan i huntu ku su tim a hiba e skol na un nivel mas haltu. Algun luna pasá de Keijzer a anunsiá su partida. E ta bai traha komo direktor di programa na ROC Mondriaan na Den Haag. Den bon konsulta ku ROC Mondriaan, e ta bai kombiná e funshon akí ku su ròl komo direktor di unidat na MBO Bonaire. E ta hasi esaki dos dia pa siman, prinisipalmente na distansia. Kada dos luna e ta bula bini Boneiru pa mantené sufisiente punto/área komun ku su lugá di trabou. Dam ta realisá su funshon kuater biaha pa siman na skol. Tur dos persona ta mashá kontentu ku ROC Mondriaan i e Konseho Ehekutivo di SGB a hasi e solushon akí posibel. 

Konfiansa

Ku mashá konfiansa nan ta enfrentá e aña eskolar nobo. Koutelosamente Dam ta mira padilanti: 

‘Nos ta kontinuá ku tur desaroyo i liña ku nos a planifiká último añanan. Ademas nos lo dediká hopi atenshon e aña akí na estudionan BBL.’ De Keijzer ta agregá: ‘Nos tin hopi ambishon i ta mashá entusiasmá pa traha den e kolaborashon nobo akí.”