WILLEMSTAD – Shete direktiva di skol na Kòrsou a manda seis luna pasá un karta skèrpi pa Den Haag. E direktivanan di skol ta mirando un problema grandi den enseñasa. Caribisch Netwerk ta informá ku  hóbennan na Kòrsou ta haña ménos oportunidat kompará ku hóbennan di nan edat na Hulanda.

Hopi skol na Kòrsou ta usando pa años kaba bukinan di lès antikuá. Tin un skarsedat di sèn i por ripará esei na e mobilario di skol, e edifisionan i fasilidatnan.

E pandemia di korona a hasi e  retrasonan aun mas grandi. Skolnan na Hulanda tabata duna enseñansa na distansia, na Kòrsou esei mayoria biaha no tabata posibel.

Ku e karta ku a manda Den Haag por ripará ku a kuminsá bini reakshon. Na aprel Tweede Kamer a invitá e direktivanan di skol pa un kombersashon. Na Kòrsou mes a hasi un ‘nulmeting’ pa por tin un bista di e defisiensianan den enseñansa.

Hopi hóben ta bai Hulanda pa kontinuá nan estudio i Caribisch Netwerk a publiká kaba un artíkulo riba e tema aki. Hopi studiante Yu di Kòrsou ta enkontrá problema i ta stòp ku nan estudio promé ku nan a optené nan diploma òf propedeuse. Esei por lesa tambe den diferente rapòrt ku ekspertonan a traha.

E diferensia di kultura, falta di nan hogar i e idioma Hulandes ta hunga un ròl grandi den esaki. Aparentemente e posishon inisial defisiente di enseñansa na Kòrsou tambe.