WILLEMSTAD – Remko Bicentini ta haña oportunidat pa finalisá e trabou di su bida. Esei e entrenadó di ekipo nobo di Kòrsou ta bisa na e diario de Gelderlander. Bicentini ta e entrenadó di ekipo mas eksitoso ku Kòrsou a yega di konosé. E asombro tabata grandi ora e federashon a retiré den 2020. Pero e hòmber di Wijchen ta bèk.

Segun de Gelderlander e ta un di e comebacknan mas sorprendente di e aña futbolístiko aki. A pesar di su retiro anterior Bicentini no a duda niun momentu ora ku federashon di futbòl FFK resientemente a bati porta serka dje. “Tin un presidente nobo, Ramiro Griffith”, Wijchenaar di 54 aña ta bisa. “Tin un bunita plan. Mi ta kuminsá mésora i ta drenta un trayekto pa kuater aña. Ku e meta grandi: Kampion Mundial WK na 2026.”

I esei ta ‘un meta hopi real’, Bicentini ta pronostiká. “Ora a ponemi un banda dos aña pasá, esei tabata un sorpresa total. Pa ami i e hungadónan. Nunka ainda Kòrsou  a presta bon asina. Mi a sinti komo sifuera a kita mi yu for dimi. Komo sifuera a kita e trabou di mi bida for dimi. Ta fantástiko ku mi ta haña e oportunidat awor pa finalisá esei.”

Despedida di  Canada

Su regreso na Kòrsou ta nifiká tambe un despedida di Canada. Ku The Canucks segundo entrenadó di ekipo Bicentini lo a partisipá  e aña aki na WK na Qatar.

“Mi no a konsiderá pa traha kompromiso ku Kòrsou pa asina mi por a keda aktivo na Canada tambe te ku e WK”, Bicentini ta bisa de Gelderlander.

 “Mi ta skohe kompletamene pa mi trabou nobo. Eksperensiá un WK ta algu grandioso. Pero regresá mi dushi Kòrsou ta mas grandioso. Kòrsou ta mi pais, un parti importante di mi bida.”

I tin un motibu mas pa e anterior hungadó di bala di NEC laga e WK pasa. “Kòrsou i Canada ta klasifiká den e mésun grupo pa Nations League. E ekíponan ei ta hunga kontra otro komienso di otro aña. E ora ei mi no ta bai sinta riba banki serka Canada den novèmber.”

Ta konsiderá Bicentini komo e entrenadó di ekipo mas eksitoso di Kòrsou. Bou di su guia (desde 2008 komo asistente i despues di 2016 komo e persona responsabel mayó) e ekipo nashonal a pone stapnan gigantesko. Kòrsou a bira kampion di Caribe i a posishoná su mas vários biaha pa Gold Cup, e kampionato di paisnan pa Amérika del Norte i Amérika Sentral. Un biaha asta nan a alkansá kuart final.

Despues di su salida fòrsá Kòrsou no a logra resultadonan impaktante mas.  “Tambe ora mi tabata sigui’é di distansia, mi tabata spera pa e hungadónan i e hendenan di e pais ku e ekipo por a sigui bòrda riba loke a konstruí den mi añanan. Ku e prestashonnan lo a sigui progresá. Pero tur hende por a mira ku esei no a sosodé.”

“Mi despedida na 2020 tabata teribel, pero mi por saka tambe e positivo for di e negativo. Mi a siña hopi na Canada i mi tabatin tempu pa logra e diploma di entrenadó mas haltu. Mi mochila ta yená ku eksperensia ku di otro manera mi lo no a haña.”