WILLEMSTAD – A haña asbèst den partinan di e kompleho di hotèl di e anterior hotèl Van der Valk den Punda. Promé ku 1994 tabata usa asbèst den diferente material i produktonan di konstrukshon, entre kua elementonan di semènt.

Ekspertonan a ehekutá un inventarisashon di asbèst i a mustra detayá unda e asbèst ta situá dentro di e kompleho di hotèl Plaza. Por lo general material ku  ta kontené asbèst no ta trese peliger kuné tanten bo no mishi kuné

Pa por eliminá e asbèst na un manera seif mester sigui un proseso kuidadoso. Pesei segun espektativanan un kontratista sertifiká lo kuminsá na final di ougùstùs ku eliminá e material ku ta kontené asbèst.

Mientras tantu a pone e partidonan konserní na altura di e trabounan planiá i medidanan di prekoushon ku mester tuma.

Siguiente stapnan

Na e momentunan aki ta hasiendo e preparashonnan pa eliminá e asbèst i ta trahando pa revitalisá e sitio úniko i históriko aki.

Huntu ku e plataforma di esnan interesá Fondo di Penshun General ta trahando na un vishon konhuntu ku na final mester kontribuí ku un kontribushon positivo pa trese bida bèk den Punda i lanta e ekonomia di Punda i sobrá di Willemstad.

E seguro di penshun ta e motor tras di plannan pa desaroyá e sitio di nobo bou di nòmber di Waterfort Plaza.