WILLEMSTAD – Despues ku Konseho i Supervishon di Curaçao Tourism Development Foundation CTDF a efektuá entrevista- i evaluashonnan ámplio, a nombra Muryad de Bruin komo Counterpart di e Direktor Statutario di Curaçao Tourist Board, CTB i Jacqueline Sybrandy-Held komo Mènedjer Regional di Amérika del Norte. Nan tur dos a kuminsá traha kaba.

De Bruin ta responsabel pa duna direkshon stratégiko i guia e organisashon pa manehá destinashon i merkadeo. E ta fungi komo konsehero di gobièrnu riba e tereno di turismo i ta representá Kòrsou riba tur plataforma ku ta dirigí spesífikamente riba turismo, tantu lokal komo internashonal.

De Bruin a nase i lanta na Kòrsou i ta bon na altura di e esfuersonan turístiko di e isla. Último seis aña i mei e tabata okupá e funshonnan  di Mènedjer Regional na CTB. Resientemente e tabata Mènedjer Regional pa Europa i tabata traha for di ofisina di VVV na Den Haag. Dos aña promé e tabatin e mésun funshon pa e merkado di Suramérika, kaminda De Bruin na final tabata responsabel pa kresementu di turismo for di e regionnan ei.

Norteamérika 

Jacqueline Sybrandy-Held  ta supervisá desaroyo i implementashon di esfuersonan pa benta pa CTB riba merkado Norteamérikano. Den su funshon e ta responsabel pa kresementu di e kantidat di turistanan ku ta yega aki, kontrolá  e tim di region i fasilitá informashon (estadístiko) di gerensia.

Segun e organisashon Sybrandy-Held ta hopi apto pa e ròl i ta traha desde 2008 den sektor turístiko di e isla na momentu ku el a kuminsá su karera na Hotèl Floris Suite. For di e tempu ei el a traha na vários hotèl na Kòrsou den diferente departamentu, manera reservashon, kongresonan, eventonan, benta i merkadeo i mas resien komo mènedjer general na Blue Bay Hotel and Services. 

Promé ku esei e tabata Direktor di Benta i Merkadeo na Baoase Luxury Resort, durante kual temporada e volúmen di kamber a krese ku mas di 150 porshento i a surpasá e benta total ku a presupuestá.  Durante e sinku añanan ku e tabata tin e mando  okupashon a subi i e averahe di e tarifa di dia tambe.

Luna rèkert

E anunsio pa e dos posishonnan aki ta bini na e momentu ku turismo di e isla ta sigui krese lokual ta resultá den un luna rèkert na yüli. CTB a informá ku 48.246 bishitante a keda drumi pa e luna ei, lokual ta  promé biaha ku a registrá 48.000 bishitante den lunanan di verano. Esei ta mas ku e yegadanan di kasi 11.000 èkstra bishitante den luna di yüli di 2019

Merkado Merikano a presta mihó ku tur e otro kantidat di bishitantenan ku a registrá anterior ku un total di 10.207 bishitante Merikano na luna di yüli. Esei ta un kantidat rèkert di bishitante Merikano den un luna.

“Mirando e sifranan di kresementu pa Estados Unido i e patronchi kresiente ta inkreiblemente inspirativo i un direkshon ku mi no tin idea di mira baha ora mi aseptá e reto aki”, Sybrandy-Held a deklará.

“Mi eksperensia di 14 aña di turismo – spesífikamente eksperensia di benta i merkadeo ta semper prinsipalmente dirigí riba merkado Norteamerikano i mi ta ansioso  pa konsentrá mi esfuersonan einan pa sigui alkansá sifranan rèkert pa e isla.”