WILLEMSTAD – Inspekshon a deskubrí ayera un konsultorio médiko ilegal den un kamber di hotèl na Punda. E dòkter a kombertí e kamber di hotèl den un espasio pa traha pa trata  pashèntnan.

Funshonarionan di Inspekshon Ekonómiko di MEO a deskubrí e práktika ilegal aki despues di un tep. Na momento di e redada polis tambe tabata presente.

Segun e matutino Èxtra ta trata di un konsultorio médiko ku un señora Venezolano ta dirigí. Den un deklarashon e señora ta bisa ku tur kos eiden tabata pa su propio uzo.

Den un djùg a haña un kantidat grandi di angua uzá i riba un pankarta tabatin un lista di preis ku tur servisio médiko ku ta ofresé, manera tratamentu pa parkinson, multiple sclerose, migrèn, doló agudo i króniko, strès, depreshon, ansiedat i diferente otro kondishon.

Tambe a haña un diploma médiko kaminda tin pará ku e señora a terminá su estudio na Colegio de Medicos na e provinsia Venezolano Falcon.

Segun Èxtra e señora a entregá un petishon anteriormente serka ministerio di Salubridat pa por traha na Kòrsou, pero a desaprobá e petishon. Tambe e señora tabata aktivo na Aruba anteriormente.