KRALENDIJK- Djaweps mainta gezaghèber interino Nolly Oleana a presentá públikamente e resultado di elekshon 2023. E tarea a toka Oleana, ya ku gezaghèber Rijna ta den eksterior aktualmente pa partisipá na konferensia di maneho global di awa.  

Oleana a splika ku e forma ku a atendé ku elekshon a hasi su trabou i tabatin kambia e aña aki. “A hasi e konteo di un manera diferente for di añanan anterior. Un otro persona a hasi e konteo i no esnan ku ta traha na urna. A hasi e kambio pa evitá ku algu ta bai robes. Tabatin un preparashon spesial pa e hendenan prresultado finalomé ku elekshon. A konta voto promé biaha i e dia siguiente a revisá e kontrol. Awe ta presentá e desishon final i korekto pa públiko” asina Oleana a splika.

Demokrat a pidi pa konta voto di nobo, pero e petishon aki a keda rechasá. Segun Oleana a splika e proseso a kana bon i no tin motibu pa duda den e resultado final. ”No tin un motibu bálido pa bolbe konta votonan. Kada partido tambe tin su grupo di hende ku ta kontrolá pa nada no bai robes.”

Na tur tin un kantidat di 10.232 voto bálido, 118 blanku i 174 voto inbálido. Huntu 10524 hende a hasi uzo di nan derecho di voto.

E resultado final ta ku MPB a saka 2.034 voto, Demokrat 3.975 voto, UPB 2.908 voto, 1 union pa pueblo 268 voto, M21 a saka 985 voto, Lista Suzy Thodé a saka 62 voto. E kiesdeler a keda establesé na l336.

Ku esaki e repartishon di asiento di Konseho Insular a keda igual di loke a determiná kaba, esta di 3 asiento pa PDB i UPB, 2 pa MPB i 1 pa M21. 

Protesta

Na nòmber di PDB lider di Partido Clark Abraham a protestá kontra di e echo ku no ta bai hasi un rekonteo di voto. Segun Abraham, asta tin indikashon ku sierto kos no a kana segun regula durante òf asta promé ku e elekshon, pa loke ta trata entre otro kaha di voto no seyá i algun otro kos ku no a kana segun regla. 

Tambe Abraham a mustra riba e echo ku e sifranan di voto pa kada partido, a kambia na vários momento. Oleana a keda para riba e echo ku tur kos debidamente a kana segun regla, ku a kometé sierto fout chikitu pero ku esakinan mientrastantu a keda koregí i ku ta hustamente esaki a trese sierto diferensia den e kandidat di voto ku a partisipá inisialmente, i loke a keda establesé komo resultado final i ofisial.