LEIDSCHENDAM-VOORBURG – Djaweps a habri e eksposishon ‘George Maduro Héroe di Guera di Kòrsou’. El a nase na Kòrsou i ta e úniko Hulandes Karibense ku nan a otorgá e Militaire Willems-Orde.

Por bishitá e eksposishon for di 24 di febrüari te ku 10 di mei na Buitengoed Dorrepaal na Leidschendam-Voorburg. Esei ta e sitio kaminda George Maduro a aktua sabí i ku kurashi na luna di mei di aña 1940.

“E eskohonan moral ku George Maduro a hasi den su lucha pa libertat  ta un ehèmpel inspirativo pa hóben i grandi den 2023 tambe”, segun un bosero di e munisipio.

Historia

George John Lionel Maduro a nase riba 15 di yüli 1916 na Kòrsou. E ta pasa su hubentut na Kòrsou. George tabata yu mayó i úniko yu hòmber, huntu ku su ruman muhé Sybil, formando e famia Hudiu-Sefardita di Joshua i Rebecca Maduro.

Ku su djes aña George ta bai Hulanda i despues di su skol sekundario e ta bai studia lei na Leiden, kaminda e tabata biba na momento di e  invashon Aleman na 1940.

E ta haña yamada pa drenta ehérsito i ta haña hopi atmirashon ora ku e ta prevení ku na luna di mei 1940 e invasornan Aleman ta invadí Villa Leeuwenberg (e aktual Buitengoed Dorrepaal) serka di aeropuerto Ypenburg, di manera ku no por a invadí Den Haag inmediatamente.

Esaki ta un di e faktornan ku tabata determinante  pakiko e gobièrnu di aquel entonces i famia Real por a haña tempu pa hui bai Inglatera.

Despues di e kapitulashon Hulandes e ta bira prisonero di guera den e prizòn notorio na Scheveningen. Despues ku a lagu’é liber George ta bai den rebelion.

Finalmente e ta disidí di hui bai Inglatera, kaminda ta traishon’é i ta pon’é prezu na Saarbrücken. Na novèmber 1944 ta hib’é e kampo di konsentrashon Dachau, kaminda e ta muri na luna di febrüari 1945 di tífùs.

Exposishon

A desaroyá i tene e eksposishon kaba na Kòrsou na 2016 pa konmemorá 100 aña di nasementu di George Maduro. A realisá e eksposishon den koperashon ku e munisipio Leidschendam-Voorburg, Stichting de Cultuur Kameleon i sentro di salú Middin.