KRALENDIJK- Boneiru ta bai aktivamente en buska di hende konsiente di medio ambiente pa e kampaña di Earthonauts ku a lansa resientemente. Ku partinan igual di trabou boluntario i eksplorashon ku wowo hanchu habrí, e programa ta invitá bishitantenan pa eksperensiá un di e último fronteranan bírgen ku a sobra di nos planeta: Boneiru.

Awor ku henter mundu ta wak den direkshon di espasio komo e siguiente trènt den biahamentu, a desaroyá e inisiativa akí pa kòrda nos ku ainda tin lugá pa eksplorá riba nos propio planeta, por ehèmpel Boneiru. 

Pa duna sosten na e mishon akí, Boneiru ta enfoká riba turistanan espasial bionario, pa medio di un kampaña di konsientisashon ku ta invitá hendenan manera Elon Musk, Richard Branson i Jeff Bezos pa posponé nan aspirashonnan astronóutiko i enkurashá hendenan pa konsentrá nan mes riba eksplorashon di mundu na un manera responsabel. Via publikashonnan ku hopi enfoke den medionan di komunikashon, ta invitá e lidernan den turismo espasial akí pa partisipá na e mishon inougural di Earthonauts, pa medio di ‘billboards’ pafó di nan sitionan di lansamentu (Blue Origin, Virgin Galactic i SpaceX) i nan ofisinanan.

‘Nos ta usa e espasionan sumamente spesífiko pa propaganda akí pa hala atenshon di algun di e personanan ku mas influensia na mundu ku lo por yuda e kampaña logra su meta’, segun Troy Dunn, fundadó i presidente di Dunn&Co, e konosido ofisina di propaganda di Boneiru. ‘Tur e tres bionarionan akí a aportá na nan propio manera na mundu i nos ta pidi nan pa trese e mesun energia akí Boneiru. Esaki ta un invitashon pa eksperensiá e frontera final di e planeta kaminda nos ta biba.’ 

Video

Miéntras Musk, Bezos i Branson ta risibí invitashon personal pa partisipá na e mishon, biaheronan interesá por registrá pa medio di manda un video riba JoinTheEarthonauts.com. Minusiosamente lo selektá sinku Earthonauts pa risibí un biahe pa Boneiru kompletamente pagá pa yuda den e esfuersonan lokal pa konservashon di naturalesa durante nan eksplorashon di e destinashon bírgen akí. E Earthonauts lo yuda Boneiru, un isla ku pa desenas di aña ta konosí pa  protekshon di su ambiente natural, ku promoshon di su mishon di Blue Destination.

‘Nos sa ku te ainda nos planeta tin kos pa siña nos, sekretonan pa kompartí ku nos i milagernan nobo pa nos atmirá’, segun Miles B. M. Mercera, direktor di Tourism Corporation Bonaire. ‘Pa e motibu akí nos ta lansa e programa di Earthonauts i nos ta trese biaheronan konsiente di medio ambiente na nos isla. Nos ke krea konsientisashon pa e bunitesa natural ku bo ta haña den tur hende su kurá di kas i nos ke enkurashá mas biahero pa eksplorá na un manera responsabel i gosa di esaki.’