WILLEMSTAD – Ayera a kuminsá ku e kaso den apelashon di miles di mion di florin di Banko Sentral kontra e anterior dirigentenan di Ennia, entre kua Hushang Ansary di 97 aña, ku por sierto a hasi aña ayera. E no a hiba palabra manera a spera.

E defensa tabata na enkargo di su propio abogado di Estados Unido. E tres wesnan ku mester dikta sentensia no ta di Kòrsou, pero a bini spesialmente for di Hulanda pa e kaso aki. Nan a huramentá promé ku e huisio. 

Den Korte di Prome Instansia a sentensiá e eks-dirigentenan di Ennia pa paga dañonan i perhuisio kuantioso. Ansary por ehèmpel, e anterior hefe mas haltu di Ennia, mester paga su propio kompania di seguro Ennia mas ku un miar florin na daño i perhuisio.

Ta akusá Ansary i un kantidat di sosio di a hasi Ennia konsientemente bashí. Na 2018 Banko Sentral a intervení, pone e kompania di seguro bou di kuratela i a entamá un kaso kontra e dirigentenan pa haña e sèn bèk na fabor di e aseguradonan.

Fuera di e empresa madre Parman i Ansary mes e akusadonan den e kaso aki ta su yu muhé Nina Ansary i e anterior dirigentenan di Ennia Ralph Palm, Gijsbert van Doorn en Abdallah Andraous.

A reservá tres dia pa e tratamentu, ku posiblemente por bai te djaweps.