KRALENDIJK – Ambtenarnan di Direktorado di Supervishon i Mantenshon di Lei a kuminsá ku kontròlnan di preis riba produkto den e asina yamá ‘makutu básiko’ na diferente supermerkado. 

A tuma e paso akí pa motibu di e preokupashon kresiente tokante preisnan di produktonan esensial ku ta subiendo, kaminda hopi tienda ta hasi uso di preis mas haltu ku rasonabelmente ta akseptabel. 

E meta prinsipal di e kòntròl akí ta pa sòru ku preis di e produktonan básiko ta keda pagabel pa tur habitante di Boneiru. E makutu básiko ta enserá komestibel esensial i artíkulo di uso diario ku ta krusial pa kasnan di famia promedio. Un stipulashon di preis honesto ta kontribuí na aliviá gastunan finansiero pa nos habitantenan i ta garantisá un standart di bida mas aksesibel.

Rapòrt

Ora ku terminá ku e análisis di preis den supermarket, Direktorado di Supervishon i Mantenshon di Lei, den kolaborashon ku Fundashon Tienda Pa Konsumidó Boneriano, lo presentá un rapòrt kompleto tokante preis den e tiendanan akí.