Kralendijk- Segun Entidat Públiko Bonaire (EPB) a pesar di e kantidat nobo di kontagio durante último dinan aki, na e momentu akí no ta motibu pa tuma medida mas pisá.

Segun departamento di Salubridat Públiko, tin bon bista riba e kontagionan. Di kasi tur hende ta konosí unda nan a haña e kontagio. Ta bai prinsipalmente pa hóbennan ku keho leve. Awor aki no tin ningun indikashon  ku e hóbennan akí a plama e kontagio bou di gruponan vulnerabel manera hende grandi. Ku e kantidat di kontagio i un persona hòspitalisá, kuido no ta bou di preshon.  

Oumento

E departamento di Salubridat Públiko ta antisipá ku e kantidat di kontagio ta bai subi e dianan ku ta bini. Tin mas kontakto di personan kontagiá ku mester tèst e dianan ku ta bini. Tanten ku e kontagionan nobo ta keda limitá na kontakto direkto, no tin motibu pa preokupashon. Na Boneiru 71, 3 % di e grupo di 18 aña i mas ariba ta kompletamente bakuná i 81,7 % a pasa e promé angua di corona. Pa e motibu ei, e departamento di Salubridat Públiko ta pensa ku ta posibel pa tene e kontagionan bou di kontròl sin tuma medida mas pisá.

Bakuna

Di hóbennan den e edat di 12 te 18 aña, 24,8% ta kompletamente bakuná, i 38% a pasa e promé angua. Pa e motibu ei, Salubridat Públiko ta pidi mayornan i tutornan pa laga bakuná muchanan den e edat di 12 te 18 aña. E espektativa ta ku mas hóben lo kontagiá awor ku e variante dèlta ta aktivo na Boneiru i aña eskolar a kuminsá.

Siman pasá tabatin 49 kaso nobo di kontagio na Boneiru. E parti mas grandi ta pertenesé na tres grupo, ku ta dos klas i un ekipo di futbòl. Salubridat Públiko ta tene e situashon bon na bista, i spesialmente serka hóben i na skol. Alumnonan por bai skol normalmente. Si tin mas kontagio den un klas, e ora ei e skol den konsulta ku Salubridat Públiko ta tuma medida mesora.