KRALENDIJK – Djabièrnè 11 di ougùstùs a yama bonbiní na Miss Preteen I Miss Petite  ku nan logronan na e sertámen di Miss and Mister Hispanoamerica Internacional, na Repúblika Dominikana. Miss Pre Teen a bai pa Kaylee Winklar i Miss Petite Irlenska Martinus.

Na nan yegada diputado Jolinda Craane a entrega ámbos un bunita buket di flor i a bisa: “Mes kos ku nos himno ta bisa, wak pa ta mentá. Sigui saka kara di e isla aki. 

Nos tin ku konsiderá e kosnan aki, pasobra ta kos ku ta saka e bandera di Boneiru den publisidat. Mi ta kere tin diferente aktividat, ku ta yuda pa e hende di Boneiru, bai saka kara den eksterior. Mi ta kontentu ku e logro di e misnan.”

“Nos a traha hopi duru, bon preparashon, hopi kos a pasa pero nos a logra. Nos a bai komo Boneiru. Hopi disiplina a pone ku Boneiru a logra hopi. Kada biaha ku nos bai, mi ta eksperensia kosnan nobo ku ta yuda den e mundu aki pa mas logro. Pabien Boneiru”, asina Johnrick Anthony a bisa na e okashon.