ORANJESTAD- E hóbennan di ACE Tweens Club ta na Aruba actualmente pa djoin dos projekto den un Gang di Arte Aruba i Dream Dare Do organisá pa Deparatamentu di Cultura Aruba i Popcorn Dancers. E enkuentro, segun e organisadónan aki ta un “melting pot” di creatividat.

E tayernan liderá pa coachnan internashonal lo kultivá un ambiente kolaborativo tantu pa ACE Tweens komo pa e hóbennan Arubiano. E intenshon ta pa nan por sigui desaroyá i krese komo artista i tambe komo persona. Huntu nan lo krea shownan úniko den un siman di tempu, mesklando nan talentonan i kultura. 

Aparte di partisipá na e tayernan i traha den kolaborashon pa un presentashon Aru-Boneriano ACE Tweens lo presentá na Aruba dos produkshon original kual ta i “ACE-WOOD” i “Mi Kultura ta Uni-Ko” na Aruba.

ACE Tweens lo enrikesé nan konosementu kultural Artístiko durante di e 10 dianan aki i engrandese e meta di e organisashon. Krea artistanan hóben pa futuro di Boneiru.

Miéntras e hobennan aki ta interaktua ku otro, nan no ta solamente artista, sino tambe embahadornan di nos kultura Boneriano. Tresiendo un mensahe di union i kompartiendo nan pashon artístiko ku sigur lo resoná mas leu ku e esenario.

Un aña pasa e hobennan a presentá na Gang di Arte Aruba kaminda ku nan a wòrdu hopi bon risibí. Despues e hobennan di Aruba a bai Boneiru na luna di Sèptèmber kaminda ku nan a presentá i tambe krea un presentashon huntu ku e hóbennan di Boneiru durante di e apertura di Gang di Arte Boneiru. E bia aki, despues di risibí diferente tayer durante 3 dia, ACE Tweens lo wòrdu repartí den diferente grupo huntu ku e hóbennan di Aruba kaminda ku pa 3 dia largu nan lo bai traha huntu pa krea un show. E shownan aki lo kompetí den Gang di Arte Aruba. Esaki ta promé bia ku e hóbennan aki lo bai kompetí na Aruba.

Laso

E interkambionan kultural segun ACE Foundation ta bisa ta un prueba di e lasonan formá ku ta trese eksperensianan inolvidabel i ku ta pone un fundeshi pa un komunidat artístiko i kultural mas uní entre Aruba i Boneiru. Nos ta deseá e hóbennan di ACE TWeens tur klase di eksito na Aruba.

ACE Foundation ta bisa di ke yama Prins Bernard Cultuurfonds Caribisch Gebied, Fundashon Wega di Number Boneriu (FWNB), MCB Boneiru i Entidat Públiko Boneiru (EPB) tur danki pa e sosten pa hasi e proyekto un realidat.